Hiperkeratozat plantare

Hiperkeratozat janë trashje të lëkurës, që mund të ndodhë në çdo pjesë të trupit, por zona e shputave të këmbëve është pjesa më e predispozuar për shfaqjen e tyre. Shkaktar është prodhimi i tepërt i një proteine të quajtur Keratinë, të cilën e prodhon vetë lëkura.

Zhvillimi i hiperkeratozave stimulohet nga:

  • presioni i vazhdueshëm në një pikë të caktuar,
  • fërkimet me rrobat ose këpucët,
  • irritimi i herëpashershëm i lëkurës.

Shkaqet e shfaqjes janë të shumta, por ndër më të shpeshtat mund të përmendim:

  • Verruket plantare (Lythat), dëmtime të lëkurës të shkaktuara nga një virus (HPV).
  • Kallot, grumbullimi i qelizave të vdekura, si pasojë e presionit të ushtruar në një pikë të caktuar të shputës së këmbës.
  • Ekzema kronike, inflamacioni i vazhdueshëm i lëkurës, i shkaktuar nga agjentë të jashtëm irritues etj.

Pjesa më e madhe e hiperkeratozave plantare nuk shkaktojnë dhimbje, me përjashtim të kallove dhe verrukeve, të cilat mund të bëhen të dhimbshme gjatë ecjes, duke e kushtëzuar njeriun në aktivitetin e tij të përditshëm.

Masat parandaluese kanë një rëndësi të veçantë për këtë problematikë. Ndër to mund të përmendim disa këshilla praktike që mund të ndiqen lehtësisht:

  • të pastrojmë mirë këmbët,
  • të përdorim kremra zbutës,
  • të mos ecim asnjëherë zbathur,
  • të përdorim këpucë të rehatshme e që nuk na vrasin. Këpucët është më mirë t’i blejmë gjatë pasdites, në mënyrë që enjtja e këmbëve që na krijohet gjatë ditës, të mos bëhet shkak për lëndime.

Trajtimi bëhet në varësi të shkakut, ndaj dhe është e rëndësishme konsulta tek mjeku dermatolog për të përcaktuar natyrën e hiperkeratozave plantare.